تانيب الضميـر

تأنيب الضمير.. الاحساس اللي مبيطلعش غير لما تعمل مصيبة..أو حاجة غلط..متعرفش بيطلع منين..بيطلع يكدرك على لحظة كنت مبسوط فيها وانت بتعمل حاجة غلط..مش عارف هوا حاجة حلوة ولا وحشة..
احيانا بحس لما بعمل حاجة غلط اني مش محتاج لحاجة تفضل تأنبني وتبكت فيا.. منا عارف انها غلط.. وده غالبا لما بتبقى كنت مبسوط وانت بتعمل الغلط ده.. ف تحس ان تأنيب الضمير بيبوظ عليك ذكرى حلوة ف خيالك لحاجة انت عملتها وبقت جزء منك خلاص..
واحيانا بحس انه لو مفيش تأنيب ضمير اصلا مش هتحس حتى انك مبسوط وانت بتعمل الغلط.. هتفضل تعمله لحد ما يبقى عادي وممل.. يمكن احساس تأنيب الضمير ده موجود عشان انك تنبسط ف اللحظة اللي بتبقى فيها ضعيف وبتغلط..
احنا كده كده بنغلط وهنفضل نغلط .. احنا بشر..
يمكن تأنيب الضمير ده هوا الأستك اللي بيرجعنا لنقطة البداية كل ما نبعد…يمكن هوا اللي من غيره مكناش هنرجع ونفكر في اللي عملناه..
ويمكن برضو هوا اللي بيخلينا نتبسط ولو حتى للحظة احنا بنبقى ضعاف فيها..
يمكن